Bygewerk op 4 September 2021
Redakteur: Jana Luther

Help ons | Blogs en artikels | Woordwisseling | Podsendings | Speletjies | Teksredaksie

Van Oktober 2019 af word hedendaagse taalgebruik – nuwe woorde, betekenisse, uitdrukkings, asook ouer vorme wat dalk elders in die slag gebly het – in dié Woordeboek van Afrikaans Vandag bewerk. Met uitsondering van beeld, klank en addisionele teks word die artikels ook in Pharos Aanlyn opgeneem. Tik ’n woord in die kassie en vind dié woord dadelik, indien dit opgeneem is – ook Engelse woorde. Onthou dat dit ’n lewende woordeboek is wat heeltyd groei en verander. Sluit aan by ons leesprogram en help ons.

A | B | C | D | E | F | G | H | I | J | K | L | M | N | O | P | Q | R | S | T | U | V | W | X | Y | Z

web s.nw. (rekenaar, internet)
diep web ongeïndekseerde dele van die Wêreldwye Web, wat nie met gewone soekenjins vindbaar is nie, omdat dit geënkripteer of deur middel van wagwoorde beveilig is: Die diep web verwys na alles op die wêreldwye web wat nie deur soekenjins geïndekseer of deursoek kan word nie. […] Dit sluit onder meer ook in databasisse, forums waarvoor registrasie nodig is en ander kommunikasie wat nie deur soekenjins nagespoor word nie. Na raming word net sowat 4% van alle internetblaaie deur soekenjins geïndekseer, wat beteken die res is alles deel van die diep web (Willem Kempen, Vrye Weekblad, 17 Julie 2020). Die diep web [is] die laag net onder die oppervlakinternet, wat deur soekenjins soos Google, Firefox en Chrome deursoek kan word. Die diep web – wat die donker web verdwerg – bestaan uit groot databasisse, akademiese tydskrifte en webtuistes net vir lede, soos aanlyn bankdienste (Finweek, 2 November 2017). | SINONIEM(E): onsigbare web | verskuilde web | ENGELS: deep web

donker web ongeïndekseerde dele van die Wêreldwye Web waartoe toegang verkry kan word slegs deur middel van spesiale sagteware wat verseker dat gebruikers anoniem bly en nie opgespoor kan word nie: Ontspan, jy gaan nie sommer per ongeluk in die donker web beland nie. Die kinderpornograwe, dwelmhandelaars, identiteitsdiewe, mensvleis-eters, huurmoordenaars, slawehandelaars, wapenhandelaars, vriende van Jeffrey Epstein en ander van die wêreld se onguurste karakters verwelkom nie maklik nuwelinge in hul onderskeie hoekies van die web nie – jy moet daar wíl wees, jy moet die regte programmatuur hê en jy moet weet presies waar om te soek (Willem Kempen, Vrye Weekblad, 17 Julie 2020). Die donker web is net ’n klein deeltjie van die diep web. Anders gestel: Alles wat donker is, is diep ook, maar alles wat diep is, is nie donker nie. En die meeste van wat boos is, is donker, maar nie alles wat donker óf diep is, is boos nie (Willem Kempen, Vrye Weekblad, 17 Julie 2020). Die donker web bevat hoofsaaklik wettige, selfs alledaagse, inhoud. Die afdelings wat nie wettig is nie, word oorheers deur dwelms, bedrog en kombinasies van onwettige aktiwiteite – hoofsaaklik die donkerwebmarkte (Finweek, 2 November 2017). Die donker web is oorspronklik in die 1990’s deur die Amerikaanse vloot ontwikkel, en militêre, staats- en wetstoepassingsagentskappe is steeds onder sy hoofgebruikers (Finweek, 2 November 2017). | ENGELS: dark web

KYK OOK: donkernet


 Nuut: Red ons van Plastiekengels (rubriek) | Son en skaduwee (rubriek)

Soek met spesiale karakters

SimboolFunksieVoorbeeld
"..."Frase"ten opsigte van"
_Een ontbrekende karaktercal_one
%Enige aantal ontbrekende karakterska%abidiol
/1-9Binne dié getal woorde van mekaar, in dié volgorde"wat lei"/7
@1-9Binne dié getal woorde van mekaar, in enige volgorde"wat lei"@7
&Vind al tweevirus & epidemie
|Vind die een of die andervirus | epidemie
#Vind die een of die ander, maar nie al twee nievirus # epidemie

Hierdie woordeboek is nié aan enige ander projek verbind nie en word deur niemand geldelik gesteun nie; dit is ’n eie inisiatief en ’n aparte, onafhanklike projek van die redakteur en gebruikers wat via die leesprogram daaraan meewerk.

Kopiereg © 2020-2021 Jana Luther