hapties b.nw. | haptiese | met betrekking tot die tassintuig – dinge waaraan jy kan vat en/of wat jy kan voel.

› haptiese handskoen (virtuele werklikheid) spesiale handskoen wat ontwerp is om aan die draer daarvan ’n bepaalde aanraak- of taservaring te bied, soos tydens die speel van ’n videospeletjie: › Om die ervaring moontlik te maak en vir gebruikers die metaheelal ’n werklikheid te maak, ontwikkel die span haptiese handskoene: gemaklike en aanpasbare handskoene wat ’n reeks sensasies in virtuele wêrelde kan weergee, insluitende tekstuur, druk en vibrasie [...] Die doel is om eendag die handskoene met jou virtuele-werklikheid-kopstuk te verbind vir ’n meesleurende ervaring soos om na ’n konsert te gaan of by die tafel van ’n pokerspel te sit in die metaheelal (Werner Wippenaar, Netwerk24, 19 November 2021). ◌ SINONIEM(E): kuberhandskoen ◌ ENGELS: cyberglove | dataglove | wired glove

› haptiese pak (virtuele werklikheid) spesiale uitrusting wat ontwerp is om aan die draer ’n bepaalde aanraak- of taservaring te bied, soos tydens die speel van ’n videospeletjie: › Die videospeletjie Phasmophobia speel reeds op die tassintuig in. Spelers met haptiese pakke [...] kan voel hoe monsters en geeste aan hulle vat. Die nuwe toevoegings tot virtuele realiteit sal straks later oorspoel na flieks en ander vermaak (Liesl Peyper, Rapport, 2 Januarie 2022). ◌ ENGELS: haptic suit | haptic vest | gaming suit | tactile suit

› haptiese tegnologie tegnologie wat deur bewegings, vibrasies en/of deur bepaalde kragte toe te pas met ’n gebruiker kommunikeer: › Haptiese tegnologie is enige soort tegnologie wat vir jou ’n tasbare reaksie gee, soos wanneer jou slimfoon vibreer as jy ’n oproep of boodskap kry en ook as jy die skerm raak (Werner Wippenaar, Netwerk24, 19 November 2021). › Haptiese tegnologie [...] bestaan al sedert die 1970’s. Dit simuleer die sintuie van aanraking en beweging en word gebruik in mediese toerusting, videospeletjies en meer (Werner Wippenaar, Netwerk24, 19 November 2021). › Vanjaar sal ons die opkoms van die gebruik van virtuele realiteit, 3D-hologramme, haptiese tegnologie, biometrie, 3D-druk en huisrobotte sien (Finweek, 10 Maart 2016). ◌ ENGELS: haptic technology | kinaesthetic communication | 3D touch

oorsprong:
Van Grieks haptesthai aanraak

KYK OOK: metaheelal