captcha akr. [Engelse verkorting van completely automated public Turing test to tell computers and humans apart] ◌ Ook [met hoofletters] CAPTCHA, (dikwels gebruikte, maar nie-erkende skryfwyse) Captcha ◌ toets om vas te stel of ’n webbladbesoeker ’n mens of ’n masjien is, soos ’n versoek om ’n reeks moeilik leesbare karakters oor te tik of voorwerpe in ’n aantal prente te herken: › die Captcha, daardie irriterende prentjies wat op die internet gebruik word om seker te maak jy is wel van vlees en bloed en nie sommer net ’n outomaat wat maak of hy ’n mens is nie. Hulle benut onder meer die manier waarop die menslike brein visuele inhoud soos dié op ’n foto interpreteer [...] En dit is nogal belangrik vir die funksionering van die internet. Sonder Captchas sou dit byvoorbeeld maklik gewees het om outomate te gebruik om miljuisende webgebaseerde e-posadresse te skep waarmee vals identiteite geskep sou kon word (Willem Kempen, Netwerk24, 9 Augustus 2014). › Van die besonderhede wat gebruikers moes invul, sluit in hul naam, van, ID-nommer en selfoonnommer. Daar is ook vereis dat gebruikers ’n sogenaamde reCaptcha moes invul voordat hul navraag versend kon word. ’n reCaptcha is ’n Captcha-funksie op talle webwerwe wat help keer dat vorms outomaties deur ’n rekenaar voltooi word. Dit is ’n manier om met redelike sekerheid te bepaal dat dit ’n mens is wat die vorm invul (Petrus Malherbe, Netwerk24, 20 April 2018).

samestelling(s):
captcha-uitdaging: › Die foto waarin jy ’n verkeerslig moet identifiseer. Ek het dit nageslaan: Dit word ’n CAPTCHA-uitdaging genoem. As jy saamspeel, help jy Google om hulle KI-masjien op te lei deur voorwerpe in foto’s uit te wys wat rekenaars nie noodwendig kan herken nie. So help jy hulle om beter met beeldherkenning te word, wat hulle sal help om CAPTCHAS in die toekoms te fnuik. Ons kan nie wen nie, lankal nie meer nie (Deborah Steinmair, Vrye Weekblad, 5 Desember 2023).