Woordeboek van Afrikaans Vandag

semigrasie s.nw. [geen meervoud] verhuising van een deel van ’n land na ’n ander: › Die onderwerp van semigrasie kom dikwels ter sprake by etenstafels en in gesprekke met kliënte – die verskynsel dat mense provinsies verlaat waar hulle voel dienste in duie stort en lewensgehalte negatief beinvloed word (Wicus Pretorius, Tuis, September 2023). › Ek het diep oor die semigrasiekwessie nagedink wat verlede maand weer die nuusopskrifte gehaal het. “Semigrasie” verwys hier na die nuwe groot trek suidwaarts, van Suid-Afrika se “hinterland” terug na die Kaap, veral Kaapstad, glo deur misnoegde wittes wat wegvlug van “African nationalism” in die noordelike provinsies. Semigrasie – ons kan nou maar die aanhalingstekens weglaat – is intraland-hervestiging, teenoor emigrasie na ’n ander land (Ismail Lagardien, Vrye Weekblad, 3 Februarie 2023). › Oënskynlik kan die huidige vlaag van semigrasie in Suid-Afrika die beste as ekonomiese migrasie verstaan word; mense op soek na ’n beter lewe en beter geleenthede vir toekomstige generasies van kinders en volwassenes (Ismail Lagardien, Vrye Weekblad, 3 Februarie 2023). › Is die Groot Trek uit die Noorde werklik ’n ding? Die sogenaamde semigrasie na die Kaap deur mense wat voel regeringsdienste is beter in die Wes-Kaap? (Anneliese Burgess, Vrye Weekblad, 4 November 2022). › Wat in die Wes-Kaap se guns tel, is die verskynsel van semigrasie, met mense wat van die res van die land daarheen trek. Dis veral ook omdat groot dele van Kaapstad kan spog met minder fases beurtkrag as in die res van die land danksy die Steenbras-pompopgaarskema (Francois Williams, Netwerk24, 19 Oktober 2022). › Is stedelinge se semigrasie kusstede toe volhoubaar? (Hanlie Retief, Rapport, 2 Oktober 2022). › ’n Nuwe tipe “migrasie” wat deesdae as semigrasie bekend staan. Jy trek nie landuit nie, maar slegs na ’n ander dorp of stad waar jy die lewe kan hê waaroor jy nog altyd gedroom het. (Maretha Botes, Kuier, 1 September 2022).
◌ ENGELS: semigration

samestelling(s):
semigrasiekwessie
semigrasietendens

KYK OOK: semigreer, semigrant