Afrikaaps of Afrikaaps (taalkunde, taalbeweging) ◌ Ook AfriKaaps ◌

♦ s.nw. [geen meervoud] variëteit van Afrikaans wat op die Kaapse Vlakte gepraat word: › Volgens die akademikus Quentin Williams van die Universiteit van Wes-Kaapland […] is AfriKaaps ’n taalkundige etiket wat verwys na ’n ontluikende variëteit van Kaaps, wat tipies in die Wes-Kaap gehoor word, en op sosialemediaplatforms breër gebruik word (Crystal Orderson, Vrye Weekblad, 13 September 2019). › AfriKaaps is ’n variëteit wat gebruik word deur ’n generasie van Kaaps-sprekers wat ná die 1980’s in Suid-Afrika gebore is. “Dit is ’n etiket wat wys na die transformasie van die klankpatrone, die leksikale variëteit en die grammatikale struktuur van Kaaps, na wat ons vandag beskou as ’n nuwe manier van praat en wees in daardie variëteit. Met ander woorde, om AfriKaaps te praat, is om ’n nuwe spreker van Kaaps te word.” (Quentin Williams, Vrye Weekblad, 13 September 2019). › Ek besig Afrikaaps omdat almal rondom my dit begryp en omdat die taal volgens my eintlik meer kleurryk word (Louis Sheldon, Die Burger, 16 Augustus 2019). › Eerstens het my trotsheid om Afrikaaps te praat sterker geword en ek het selfs my monoloog vir my oudisie in Afrikaaps geskryf (Tarryn-Leigh Solomons, Die Burger, 19 Junie 2019). › Sommige mense noem [Jolyn Phillips se] werk Kaaps of Afrikaaps. […] Wat noem jy jou werk? […] “Dis Afrikaans!” (Die Burger, 16 September 2019). ◌ ENGELS: AfriKaaps

♦ b.nw. | Afrikaapse | in of van Afrikaaps, of wat Afrikaaps betref: › In Afrikaapse kringe word die argument gemaak dat moderne Kaaps(-Afrikaans) nie bloot ’n variëteit van moderne Afrikaans is nie, maar die direkte afstammeling van die oorspronklike Afrikaans. Daai Afrikaans is destyds deur wit kulturele toe-eiening (lees die GRA) uiteindelik omskep in wat grootliks vandag Standaardafrikaans (algemene Afrikaans) is, ’n ander taal by wyse van spreke (Sybrandus Adema, Vrye Weekblad, 5 Julie 2024).