Woordeboek van Afrikaans Vandag

bokashi s.nw. [geen meervoud]
Ook bokasji

1 gistingsproses waarby voedselreste en soortgelyke organiese afval deur spesialisbakterieë omgesit word in ’n produk wat as voedingstof by grond gevoeg word en die tekstuur daarvan verbeter: › Bokashi is ’n komposteringstelsel. Die woord is Japannees vir “gefermenteerde organiese materiaal”. Dis ook ’n stelsel waarmee enigeen sy koolstofvoetspoor kan verminder (Corné Coetzee, Netwerk24, 24 Februarie 2015).
2 mengsel wat ’n bokashi-proses aan die gang sit: › Op dié plaas versamel ons [...] saad wat ons eersdaags gaan verkoop; ons kweek self saailinge en maak steggies; ons verander bokashi in kompos – en ons het genoeg om aan ander projekte of die publiek te verkoop (Platteland, Lente 2021). › Bokashi is kaf (gewoonlik graan-) wat met molasse en ’n spesiale soort probiotika – vol natuurlike bakterieë soos dié in kaas, jogurt, bier en wyn – behandel is. Dit word met kosafval gemeng en lugdig verseël om ’n fermentasie- en komposmaakproses aan die gang te sit (Corné Coetzee, Netwerk24, 24 Februarie 2015).
3 produk van ’n bokashi-proses: › Mikrobes wat in lae tussen kombuisafval gestrooi word, sit ’n kragtige fermentasieproses aan die gang wat die afval in ’n toe houer, soos ’n emmer met ’n deksel, binne ’n paar weke tot bokashi verwerk. (Landbouweekblad, 18 September 2020). › Bokashi is soos kompos op steroïede. Mikrobes soos dié wat gebruik word om kaas, jogurt en brood te maak, word in lae tussen organiese kombuisafval gestrooi en sit ’n fermentasieproses aan die gang wat binne twee weke ryk kompos lewer (Corné Coetzee, Beeld, 29 Januarie 2016).
◌ ENGELS: bokashi

oorsprong:
Japannees

samestelling(s):
bokashi-blik: › As jy net een permakultuur-ding doen, begin deur jou kombuisafval te herwin. Begin ’n bokashi-blik (Corné Coetzee, Beeld, 29 Januarie 2016).
bokashi-emmer: › Baie mense wat nie in die stadskom woon nie, kom hierheen om hulle vol bokashi-emmers leeg te maak of hulle lappies huurgrond te versorg (Platteland, Lente 2021). › Anders as met komposhope en wurmplase hoef jy nie kombuisafval eers uit te sorteer nie – selfs vleis, suiwel, sitrus en uie kan in jou 20 ℓ-bokashiemmer gaan (Platteland, Lente 2021).
bokashi-fermentering
bokashi-kompostering
bokashi-semels: › Elke laag afval van 3-4 cm diep word met ’n dun lagie bokashi-semels bedek tot die emmer, wat met ’n deksel verseël word, vol is. Dit is ’n reuklose fermentasieproses wat maklik binnenshuis beheer kan word (Platteland, Lente 2021).