niebinêr b.nw. | niebinêr |
1 wat nie tot twee dinge of twee dele beperk is nie.
2 wat verband hou met of wat iemand is wat met ’n genderidentiteit identifiseer wat nóg heeltemal manlik nóg heeltemal vroulik is, of wat dié op so ’n manier uitdruk: › In die eerste boek het hulle ’n moord in ’n Engelse herehuis opgelos op hulle onkonvensionele manier en nou is Claire, Sophie, die adellike Sebastian en sy nie-binêre nefie, die supercool Alex, weer saamgegooi op ’n eiland wat wemel van spoke (Deborah Steinmair, Vrye Weekblad, 31 Mei 2024). › ’n niebinêre persoon › die niebinêre gemeenskap › Die transbeweging gaan lank nie meer oor ’n binêre denkwyse nie. Talle jongmense weier deesdae om “manlik” of “vroulik” te wees. Hulle wil bewustelik niebinêr wees (Izak de Vries, LitNet, 26 April 2023). › Ek identifiseer as man en glo in gelyke regte vir almal wat identifiseer as man, vrou en niebinêr (Izak de Vries, LitNet, 26 April 2023). › Die popster Demi Lovato wil nie meer as ’n vrou bekend staan of “sy/haar” as voornaamwoord hê nie. › Vervaardigers van die wetenskapsfiksiereeks Star Trek: Discovery het die reeks se eerste transgender- en nie-binêre karakters bekend gestel (Netwerk24, 5 September 2020). › Die Amerikaner het aangekondig dat “hulle” nou as nie-binêr identifiseer. Lovato verkies die voornaamwoord “hulle” om hulself te beskryf om daarmee die “vloeibaarheid wat ek voel in my geslagsuitdrukking die beste voor te stel”. Nie-binêr of genderqueer is ’n sambreelterm vir mense wat nie as manlik of vroulik identifiseer nie – identiteite wat buite die geslagsbinêr val. (Ross Michaels, Rapport, 23 Mei 2021). ◌ SINONIEM(E): genderqueer ◌ ENGELS: nonbinary | not binary

KYK OOK: tussenmens, genderqueer, LGBTQIA
3 van of wat verband hou met ’n getallestelsel wat nie 2 as basis gebruik nie.